Tou dimoun pe dir ki SNP in azir dan en fason ipokrit lo sa size pri lavi. Ler ti pe pas lalwa dan bidze 2008 Desanm lannen pase bann manm SNP dan lasanble ti reste trankil e ti vot pour zot gro ogmantasyon saler. Zot ti fer sa apre ki zot Lider Wavel Ramkalawan ti,n al fer plizyer rankont dan gran pale State House pour diskit lo sa size. En bon laranzman ti ganny fer ant sa de lider Prezidan Michel(SPPF)ek Lider lopozisyon Wavel Ramkalawan pour pas sa lalwa trankilman san ki Seselwa I apersevwar. Sanmenm sa, sa dimyel ki zot ti pe prepare pou Seselwa.
SNP ti swazir pou reste trankil lo size logmantasyon lapey pou son bann manm ek manm SPPF ziska ler Le Nouveau Seychelles Weekly ti fer sa vin piblik dan son piblikasyon Nimero 2 date le 1 Fevriye 2008. Sa piblikasyon Le Nouveau Weekly ti ganny ranmase dan tou magazen dan sesel pou anpes dimoun ganny akse avek sa lenformasyon gro saler pou Prezidan, bann Minis e Leader Biznes Gouvernman, Leader Lopozisyon e tou lezot manm Lasanble. Personn pa ti koz lo saler travayer ler sa lalwa ti pe ganny pase pou ogmant zot saler dan lasanble.
La ki aprezan ki SNP avek SPPF pe perdi popilarite ek sipor bann dimoun ordiner SPPF pe blanm tou keksoz lo marse mondyal. 'ZNP' li in deside kriy lasasen 5 mwan apre dan en rally ki zot in fer le 25 Me, lo Freedom Square. Sa I montre ki 'ZNP' a.k.a SNP, pa senser lo sa size pri lavi. Zot pe zis fer tapaz akoz zot pe perdi sipor e zot riske pa ganny menm kantite vot ki zot ti gannyen dernyen fwa dan prosen eleksyon.
E sa pou fer ki zot pou perdi zot gro lapey ki zot ti donn zot lekor lannen pase. Seselwa ouver zot lizye e reflesir, pa rekonpans bann dimoun ek en vot ki pann pran zot zentere ler zot ti devret.
Savedir ler bidze ti pe ganny diskite an Desanm lannen pase laplipar manm SNP dan Lasanble Nasyonal ti koz kont bidze e zot ti dir ki zot pou vot kont sa bidze. Ler tin ariv ler pou vot lo bidze 2008, tou manm SNP dan lasanble Nasyonal san leksepsyon enkli bann ki ti dir zot pou vot non ti lev zot lanmen e vot anfaver sa bidze. Sa se lipokrizi SNP lo size pri lavi.
“Zot in les tonbe” big time!!!