DEPI ki Pti Michel in vin opouvwar an Avril 2004, Seselwa in komans lager tou keksoz. Seselwa in lager zonnyon, dile, ponmdeter, lafarin, materyo konstriksyon parey dibwa ek tol. Semenn pase ti annan lager siman kot Land Marine, New Port.
En gran lafoul ti'n ralye Lendi bomaten. Dimoun tin konmans ralye depi son lavey savedir Dimans apremidi. Ler tin ariv anviron 11 er bomaten Lendi lafoul tin fini vin en problenm. Lapolis ordiner ti ganny dir pou met en pe lord. Zot ti war li enposib e manm lafors SSU ti ganny demande pou vin ek zot baton ek tir gas pou sey met sa lafoul dimoun anba kontrol. Sa bann dimoun ki tin ralye kot sa baro Land Marine pa tin komet okenn krim, zot sel krim sete pou esey ganny 40 bal siman sakenn pou aranz kot zot lakour ouswa pou kontinyen fer zot lakaz.
JJ menm si in promet bokou pa pe nobou satisfer demann siman bann malere. Preski tou siman ki vin dan pei i ganny vann an gro ek bann gro kontrakter. JJ pe get zis bann gro dimoun ek bann gro businessman. Bann pti malere in fini ganny zet dekote.
Pou terminen nou oule felisit bann manm lafors SSU ki ti vini pou dispers lafoul zot ti fer li dan lord e zot ti refize anvoy tir gas lo zot frer ek ser Seselwa. Sa I montre ki menm bann zofisye SSU pe konmans konpran soufrans zot frer ek ser Seselwa. Tan ki konsern JJ nou pou ziz li par son aksyon; parey I ti dir nou fer le 4 Avril 2004 ler I ti pran pouvwar avek Ti Frans.
Sesel anba Michel pa dimyel.