PRESS RELEASE
Prezidan Michel i deplor labi seksyel kont zanfan
Swivan rapor televizyon pandan wikenn lo labi seksyel kont zanfan, Prezidan James Michel i'n eksprim son sagrinasyon ek lakoler anver sa bann aksyon deplorab.
Prezidan i deplor sa bann labi kont zanfan ki pa kapab defann zot lekor.
“I sokan. Nou bezwen redouble nou zefor pour protez nou zanfan. Mon demann lapolis pour fer tou sa ki zot kapab pour rod bann ki responsab pour pran linonsans nou zanfan e afekte zot lavenir. Nou zanfan i zanfan tou dimoun. Mon fer lapel avek tou fanmiy ek tou dimoun dan Sesel pour ed lapolis dan sa travay pour kapab atrap bann ki responsab e anpes zot kontinyen fer sa bann akt orib.”
“Labi seksyel kont zanfan i bann akt serye e kriminel. Lasosyete pe ekspekte ki lazistis i fer son travay e azir anver proteksyon nou zanfan. Bann ki ganny atrape e trouve koupab i ganny pinisyon sever ki zot merite.”
Prezidan i note ki lapolis i'n aret en zonm e i pe rimann apre ki i'n pas devan lakour.
Fini/rm