Tou le 5 Zen bann gran sef dan SPPF i al met kouronn ek fler kot sa stati an feray ki zot ti apel li zonm lib. Dan lepase Seselwa pa ti tro ganny enkonpran akoz SPPF ti al fer sa. Zot menm fer brass band vin zwe lanmizik ler zot pe depoz zot bann kouronn. Me nou oule fer remarke ki Msye Rene zanmen i vin met kouronn ek fler kot sa stati an feray le 5 zen. Tou dernyenman en gro sef dan SPPF ti les sape dan en konversayon apre de twa wiski, ki vre rezon deryer sa selebrasyon depoz kouronn le 5 zen kot zonm lib tou le lannen. Sa gro msye ti dir ki parey 'fet de mor' ler tou kretyen I al depoz fler kot latonm zot paran, zot zanfan, zot frer, zot ser, zot byeneme bann SPPF osi le 5 zen zot al met fler kot zonm lib akoz sanmenm sa zour ki zot ti touy 'laliberte' Seselwa. Anefe I parey ki zot pe al simityer me akoz 'laliberte' li in anter la kot sa stati an feray I ete zot alor vin depoz zot kouronn sa landwa. Depi le 5 zen 2008 nou pou rebatiz zonm lib e apel li 'latonm laliberte'.