I annan en pe plis ki 8 an depi ki monn aprann ki mon seopozitiv. Pou en madanm e osi en manman in vreman tough pou mwan kapab aksepte. Okomansman monn viv an silans avek mon sekre, ziska ki mon ti nepli kapab tenir. Mon ti per pou koz lo la ek mon fanmiy. Finalman ler monn ganny sa kouraz, pa tou ki'n donn mwan sa sipor. Dan lakour i annan serten manm lafanmiy ki'n gard zot zistans ziska konmela. I annan ki pa oule manz okenn repa ki mon prepare. Sa i bles mon leker. Parfwa lafason ki zot tret mwan i sitan fatig mwan ki mon esey distrer mwan avek de twa pti grog. Apre enn i vin de e finalman mon vwar mwan soule. Parfwa leten monn soule mon pa konpran narnyen e serten bann msye ki frekant landrwa kot mon bwar zot profite pou servi mwan. Mon end up dan lili avek zot. Anba lenfliyans lalkol mon pa ni menm rapel si monn servi en proteksyon.
Mon anvi sanz mon lavi me i pa fasil. Ler mon deside rod en dimoun pou mwan reste stab avek, mon vwar li difisil pou mwan dir mon partner ki mon seopozitif. Akoz mon per pangar i ava abadonn mwan ek mon zanfan. Lavi i dir konmela, e i pa fasil pou en fanm tousel fer grandi en zanfan. Finalman avek konsey ki mon gannyen, ler mon fer li mon devwar e dir mon partner laverite, olye donn mwan sa sipor e konfor, in plito abondonn mwan. De nouvo mon oblize retourn lo mon boutey ki parfwa mon santi i mon vre zanmi.
Mon mesaz alor pou zot ki pe ekout mwan atraver sa dimoun ki pe lir mon temwanyaz, se ki bann dimoun ki enfekte i bann imen. Annou tret zot byen, pou ki zot a kapab vin devan pou donn en kou-d-men dan sa kanpanny. Tan ki nou kontinyen negliz zot, parfwa zot oblize fer keksoz ki zot pa anvi fer, zis parey mwan. Mon ti'a kontan vin devan pou donn en kou-d-men dan sa lalit. Me mon pa pou zanmen fer li. Mon fanmiy pa ankor kapab santi zot konfortab ek mwan menm apre 8 an. E ou ki pa trouv narnyen pou mwan, ki manyer ou pou tret mwan alor ? Vo mye mon viv an silans ek mon maladi, akoz omwen li i detrir mwan dousman e non pa ziz mwan. Li i konsekans mon aksyon. Me ou ki ziz mwan ou fer mwan perdi gou pou viv.
Annou mazin bann ki'n kit nou. Byento petet I ava mon tour. Me demen I kapab ou.