ZOURNAL The People date 12.06.08 ki son Editer I Ralph Agrippine ti ekrir en lartik anba kolonn 'Pye Bodanmyen' anba tit “KANMI POUR DIR OU EN SESELWA”. Noun reprodwir en morso sa lartik anba:
“Sa gro Myse ki Editer en zournal I dir partou kot I pase ki li I en Angle. Akoz ou kanmi pour dir ki ou en Seselwa? Nou konnen ki ou'n ganny en sitwayennte angle akoz ou'n pran lazil politik Langleter, me oumenm ou dir ki ou'n retourn Sesel akoz “there's no place like home.”
Anplis ou 'boast' ki ou telman enportan ki dimoun pa gaspiy ou letan, me ki degre enportan ki ou ete ki ou pas letan ekrir en zournal ki menm ou dimoun pa anvi lir?”
Zournal The People avek son Editer I sitan per Le Nouveau Seychelles Weekly ek son Editer ki zot in pran en desizyon pou fer bann fo deklarasyon e atak li personelman. Sa ki Ralph Agrippine I bezwen esey rapel se ler li, I ti ankor pe fer dan napi Ralph Volcere li tin fini konmans lager kont diktater dan Sesel.
Sa paspor Angle ki Ralph Volcere I annan dan son pos deryer i gras a en aksyon direk ki France Albert Rene ti fer an 1982. I ti sinny en dokiman (Detention Order) pour aret Ralph Volcere e met li an detansyon politik. Ler Ralph Volcere ti ganny large konmisyoner lapolis sa lepok, Myse James Pillay ti fer kler ki Volcere ti pou bezwen kit pei. Parey sa lartik dan People in dir Editer Weekly ti al viv an egzil Langleter koman en refizye ziska miltiparti ti reganny etrodwir dan Sesel an Desanm 1991. Ralph Volcere ti premye Seselwa ki ti pe viv an egzil politik pou retourn Sesel zis detwa zour apre ki bann diktater SPPF ti re entrodwir miltiparti…
Sa ki Ralph Agrippine pa konnen se ki son sef France Albert Rene li osi I annan en paspor Angle. Sel fason pou Ralph Agrippne kapab met son lanmen lo enn sa paspor se fer parey son sef ti fer e al marye avek en fanm Angle li osi.
Si ou reste dan lakaz an vit Ralph Agrippine pa zanmen anvoy ros lo lakaz an vit ou prosen.