Apartir Zanvye 2008, tou bann travayer gouvernman pour ganny en lot logmantasyon lapey. Sa logmantasyon i depann lo zot saler. Bann ki ganny en gro saler, pour ganny en logmantasyon 100 roupi, e bann ki ganny en saler pli ba pour ganny 400 roupi. Travayer avek en pli ba saler i byen merit en logmantasyon. Me sa logmantasyon katsan roupi i zis pour aste dile pour en fanmiy, pour en mwa. Zot pour ankor trouv lavi ser, la ki delo, elektrisite ek gas pe al ogmante.
Nou’n tande ki bann mna pour ganny en logmatasyon saler. Sa logmantasyon i pour bokou plis ki katsan roupi. Mon mazinen i pour pliyer mil roupi. Avek sa logmantasyon, zot pour napa drwa fer 2 travay dan governman, pour zot ganny 2 lapey. Lopozisyon in felisit son lekor andizan ki se son laviktwar. Me ki pou arive, si en MNA i fer en travay dan sekter prive? I pou ganny de lapey. Eski i pour annan drwa fer li? Menm si i ganny zis en lapey ek Gouvernman? La i annan en problem. Sa bann MNA i kapab trouv en dalon dan sekter prive pour zot ganny en travay. Konman i zonm voras larzan, i posib ki sa i arive.
Mon propoze ki avek sa gro lapey ki zot pou gannyen, zot al travay dan zot distrik kot zot in ganny elekte, dan plas District Administrator. Konmsa, zot tia ganny en full time job. Sa tia permet zot konn pli byen zot distrik, son bann zabitan ek bann bezwen dimoun dan sak distrik. Bann zabitan tia war zot pli souvan, menm toulezour, olye enn fwa toule senk an pour rod vote k dimoun.
I paret ki bann Minis, ek tou bann o zofisye ki ganny apwente anba konstitisyon pour osi ganny en logmantasyon saler. Eski sa i zistifye? Deza zot pe ganny en gro saler, avek tou bann lezot lavantaz. Eski sa pa ase pour zot fer fas avek kou lavi? Sertennman ki zot pa pe ganny en logmantasyon detrwa roupi, me plizyer mil roupi an plis. Eski ser sang i zis pour en serten klas dimoun? Bann ki travay dir, bomaten aswar, pe al ganny zis 400 roupi logmantasyon, tandi ki bann MNA, bann Minis ek bann ozofisye pe al ganny plizyer mil roupi anplis, lo zot saler. Eski se pa bann ki pe travay dir, ki pe anmenn larzan dan sa pei? Se zot ki merit en pli gran logmantasyon saler. Eski bann Minis ek sa bann ozofisye i vreman bezwen en logmantasyon pour viv? Eski zot pour ankor oze demann lepep ser sang? Akoz zot pa ser zot sang en kou e larg sang bann travayer avek en pti saler? Bann ki swadizan pe rod lentere travayer, eski zot dakor ek sa logmantasyon lapey bann Minis ek sa o zofisye?
Sa refleksyon i en kontribisyon pour roes standar moral, ek valer moral, tou dimoun’ ki zot MNA ou byen Minis, parey Madanm Charles ti koz lo la dan Lasanble Nasyonal. Olye ki bann Minis ek bann o zofisye i ganny en logmantasyon saler, ti ava preferab ki zot pa pran sa logmantasyon. Me ki zot partaz sa larzan avek bann travayer ki ganny en pli ba saler. Konmsa zot ava pratik lapartaz ek lamour, parey Madanm Charles ti swete, pour ki nou Sesel i sirmont bann defi lannen 2008. Sa i en laverite ki pa sorti ni kot senyer ni kot lepap, me kot en sitwayen ki reflesir, e ki santi douler son bann frer ek ser.
Courtesy l’echo des iles