L'Echo des Iles replies

The editorial article published in the 15th July, 2007 Issue of L’ECHO DES ILES is in reference to an article ‘Le Nouveau Seychelles Weekly’ published recently. In the spirit of free-speech we reproduce the article in full as it appeared in the local Roman Catholic’s mouthpiece:

Zournal Seychelles Weekly dan son nimero merkredi 22 Zen 2007, paz 2, avek tit “Sex, lies and scandal,” i dir : “The church has inexplicably failed in its moral responsibility to condemn these immoral behaviours and address these issues in a serious manner as the moral standard of our leaders have slipped to greater depths.”

Eski sa i en repros, ou byen en lakizasyon kont legliz? Pe enport lentansyon sa Msye, me nou merit fer en refleksyon lo sa ki in ekri.

Sa Msye i servi sa mo « legliz », san presize ki legliz. Legliz katolik ou byen legliz anglikan. O ka ki i annan legliz katolik dan son lespri, sertennman ki sa Msye pe viz bann Per ek Levek. Eski sa Msye i konnen ki legliz pa zis Per, Levek?

Per ek Levek pa al kot « Love Nut », pour konnen ki i pase laba. Nou napa ni espyon ki mars deryer dimoun pour al rod nouvel pour nou. Nou napa en lapolis pou dimoun ki annan « immoral behaviours, » ni en tribinal « for people with immoral behaviours. »

Si sa Msye ti konn tou sa ki dyosez katolik pe fer dan sa pei, pour bann zenn ek bann adilt, pour donn zot en o nivo moral, en o nivo spirityel, ek en bon formasyon lavi kretyenn, zanmen i ti ava oze dir en keksoz parey. Ki sa Msye, i pran lapenn enform li, avan ki i ekri son lartik.

Dan sa pei, i annan dimoun ki oule Per ek Levek i fer tapaz dan zot plas. Me ler Per ek Levek i ganny akize, kritike, sa bann dimoun i reste trankil. Zot pa ouver zot labous. Per ek Levek pa la pour fer tou dan zot plas. Ki bann sitwayen osi i pran zot responsabilite.

Per ek Levek pe toultan ansenny lamoral dan pei. Me lamoral i pas zis en zafer al kot Love Nut, fer Striptease. Lamoral i kouver tou nou lavi, menm nou lavi prive. Ler Per ek Levek i koz lo respe drwa imen, lo respe lopinyon lezot dimoun, lo respe zot dinite, lo respe pour zot repitasyon, pe enport ki zot ete, zot pe ansenny lamoral. Zot pe form konsyans dimoun. Ansenny lamoral se osi koz kont mansonz, lenzistis, ek koripsyon. Tou sa bann living values i fer parti lamoral. Lamoral se » fer sa ki byen , evit sa ki mal ». Lamoral i ganny rezimen dan sa parol Zezi : « Kontan tou dimoun parey monn kontan zot. » Jean 15/12. Respe drwa imen se respe drwa Bondye. Bondye i prezan dan sak imen, kree a limaz Bondye. Sa se levanzil ki dir. Sa i osi lamoral.

Me Msye, ou konn tre byen ki i arive ler Per ek Levek i koz lo sa bann topik. Pa zot dir Per i fer politik, legliz i fer politik? E pourtan se levanzil ki ganny prese. I malere pour dir i annan lezot lavwa ki pres lekontrer. Si i annan serten domenn kot levanzil pa penetre dan leker Seselwa, silvouple pa akiz legliz, ni repros li, ki in « fail. » Zezi ti byen dir : “Ou leker i la kot ou trezor i ete.”

P. Edwin MATHIOT