In the Assembly this Week

This week the Assembly debated on a motion brought by Mrs Joevana Charles which reads as follows :

This Assembly resolves to call on the Government to study ways to better support families who are most vulnerable in particular single mothers.

We publish below the intervention of Hon. Frank Elizabeth (DP) on the said motion which was well received by both sides of the House.

M. Speaker, lalwa ki fer provizyon pou ed bann dimoun ki pli vilnerab dan sosyete se lalwa Sekirite Sosyal. Depi 1987 anba sa lalwa Social Security Act gouvernman inn pas en seri regilasyon pou ed bann dimoun pli vilnerab dan sosyete par met a zot dispozisyon bann benifis finansyel base en pe lo prensip en Welfare State ki governman Labour ti entrodwir langleter dan bann lanen 1960. An 1987 Prezidan Michel dan son kapasite koman Minis Finans ti entrodwir regilasyon, Social Security (Benfits) (Amendment) Regulations, 1993, dan ki I ti anons sa bann benefis par mwan:

1. Benefis pou bann dimoun malad R.775

2. Benefis Maternite R. 775

3. Benefis pou bann dimoun ki ganny aksidan dan R.775

travay e ki pa kapab kontinyen travay.

4. Benefis Envalidite R. 950

5. Benefis Dezabilite R. 775

6. Benefis pou bann dimoun ki zot imsye oubyen R. 775

Madanm Inn mor.

7. Benefis Feneray kot en dimoun ki travay I mor R.1500

Dan lafanmir

8.Pensyon Retret R.1000

9. Dependents’ Benefits R.350 (pou adilt) R.325 (pou sak zanfan)

10. Benefis pou zanfan abandonen e orfelen R.475.

Sa an gro se bann benefis ki ti ganny ofer par lalwa Social Security Act an 1987. Depi 1987 gouvernman inn entrodwir ankor en seri regilasyon tou avek bi pou ogmant sa bann benefis an relasyon avek logmantasyon dan kou lavi e an 2004, 7an pli tar ti anan en logmantasyon par moyenn R.400 dan tou benefis:

Vwar latab 1

Social Security Benefits

M. Speaker mon kwar ki kestyon ki mosyon pe demande se eski sa lalwa I fer provizyon pou ed bann dimoun pli vilnerab dan sosyete espesyalman bann manman tousel? Eski sa bann benefis dan lalwa Sekirite Sosyal I apropriye? Eski sa bann benefis pe ariv kot bann dimoun ki pli bezwen li? Si wi, eski sa bann benefis pe ariv kot sa bann dimoun atan e vitman? Eski prosedir ki anplas an se moman I senp, fasil e efektif? E finalman eski tou dimoun I okouran prosedir pou ganny ede avek bann benefis sekirite sosyal? M. Speaker, Lalwa I an plas, larzan inn ganny met a dispozisyon bann ki vilnerab e bezwen led, me eski sa bann dimoun I konen ekzakteman kwa ki fodre zot fer e koman pou fer pou ganny sa bann benefis?

M. Speaker, ler monn regard lalwa Sekirite Sosyal, en keksoz ki mon pann vwar ladan se “Means Testing”. En lot keksoz ki mon pa vwar se provizyon pou ed bann manman tousel? Mon okouran ki I anan en systenm an plas ki apel Means Testing ki globalman regard konbyen larzan en fanmir I anmenn kot lakour e si I anba en serten nivo sa fanmir I kapab ganny ede avek en sonm larzan adisyonel pou permet zot viv par lao lalinny lapovrete. M. Speaker, lalinny la povrete ti ganny mete lo en sonm R.900 par lakour par mwan an 1992 menm si saler minimonm sa lepok ti R.1600 par mwan. Lalinny la povrete absoli ti ganny mete lo la sonm R500 par mwan. Savedir en lakour ki amenn selman en sonm R.500 par mwan I ganny konsidere koman enn ki pe viv dan la mizer nwanr. Sa I ekivalan avek USD 150 par mwan pour la povrete e USD 90 par mwan pour la povrete absoli. Sa bann sonm ki mon fek mansyonen ti ganny entrodwir an 1984 apre ki rezilta en survey ti ganny pibliye.

M. Speaker, le 24 Zen 1994, en rapor pibliye par Population and Human Resources Division Department III, Africa Region, avek tit Republic of Seychelles Poverty in Paradise ti tras evolisyon la povrete Sesel depi 1984 ziska 1993. Sa rapor ti dir ki an 1984 30.7 % nou popilasyon ti pe viv dan lapovrete e 11.6% nou popilasyon ti pe viv dan la povrete absoli. An 1993 18.5% nou popilasyon ti pe viv dan lapovrete e 6% nou popilasyon ti pe viv dan lapovrete absoli. Sa rapor ti konkli ki sa bann sif I relatifman o pou en pei parey Sesel kot nivo lapey I ase rezonab. M. Speaker I kler dan sa rapor ki inn anan en rediksyon dan nivo e pousantaz dimoun Sesel ki viv dan lapovrete. Prezidan Michel limenm ler I ti mont dan leo kopolia resaman I ti dir lo televizyon ki I ankor anan dimoun Sesel ki pe viv dan lapovrete. Kestyon Akoz? Kwa ki pe fer dimoun Sesel anglouti dan sa serk visye ki apel la povrete.? Kwa ki gouvernman I kapab fer pou eliminn la povrete konpletman dan nou sosyete?

M. Speaker, fon Sekirite Sosyal I anmas li par moyenn R. 400, 000, 000 par an. Sa larzan I ganny peye par bann Anployer, Anploye ek gouvernman limenm koman en Anployer dimoun dan sekter piblik. Gouvernman ti kontribye R.143, 000, 000 dan sa fon an 2006. La dan R.125,000, 000 pou ganny transfer sorti dan fon Sekirite Sosyal pou al dan fon gouvernman. M. Speaker vwala kot larzan Sekirite Sosyal pe ale. Sa larzan I sipoze pe al kot bann dimoun ki pli vilnerab dan sosyete e non pa dan pos gouvernman. An menm tan 16% bann lakour ti amenn par moyenn R.841 par mwan kot lakour.

Sa ki monn fek ilistre I montre klerman ki lalwa Sekirite Sosyal I merit ganny amande pou fer provizyon pou donn benefis bann manman tousel e osi bann lakour ki amenn mwens ki R.2000 par mwan. Bann kriter byen kler e senp I merit ganny etablir pou tou dimoun konen si zot kalifye pou ganny lasistans sekirite sosyal ou non. En form senp pou ranpli I merit osi ganny mete kot tou ladministrasyon distrik e osi lo internet pou ed sa bann dimoun pou ranpli sa form e apre anvoy li par e-mail menm zour kot Minister konsernen. Ladministrater distrik I avar la ek son staff pou ed sa bann dimoun ranpli sa form e anvoy li tou de swit kot dimoun konsernen dan Minister.

Dimoun ki bezwen led I merit ganny ede tou de swit. I neseser alor pou gouvernman toultan donn bann dimoun ki apply pou ganny sa bann lasistans benefis du dout. E la petet gouvernman tya kapab donn sa bann dimoun en lasistans minim osito ki zot fer zot laplikasyon e apre fer en swivi pou vwar si sa dimoun I bezwen kontinyen ganny sa lasistans e pou konbyen letan. Sa sistenm I ganny aplike dan plizyer pei. Me anmenm tan I merit anan en pinisyon pou bann dimoun ki abiz sistenm sekirite sosyal. M. Speaker lotrozour menm en madanm avek 6 zanfan ki son imsye tinn ganny arête e met dan kaso ti vwar li pe fer fas avek birokrasi gouvernman pou li ganny lasistans e finalman I ti bezwen al tap laport de twa dimoun pou ganny en led akoz I ti realize ki ler ou dan bezwen ou pa kapab depan lo gouvernman. I ti al kot Minister e apre ki inn tinn pas en zournen laba I ti ganny dir fodre al dan distrik. Dan distrik nou pa konen konbyen letan DA I aziz lo file avan I fer desann anvil kot Minister. Kot Minis ankor nou pa kenen konbyen letan I pran pou aprouv en laplikasyon akoz souvann fwa I anan en lenvestigasyon ki ganny fer pou determinen si sa dimoun pou ganny lasistans oubyen non. E sa dan limenm I kapab pran plizyer semenn M. Speaker. I kler alor ki gouvernman I bezwen kree klima kot i anan en kwasans ekonomik pou kapab ramas larzan pou fon sekirite sosyal pou fer li soutenab. Gouvernman pou osi bezwen senplifye prosedir pou en dimoun kapab fer son laplikasyon vitman e ganny en larepons e dezisyon vitman. Gouvernman osi pou bezwen aret retir larzan dan sa fon e anmenn reform dan lalwa sekirite sosyal pou permet plis dimoun kalifye pou resevwar lasistans tel ki bann manman tousel e bann dimoun ki pe viv dan la povrete e dan la povrete absoli. Sa bann mezir mon kwar I avar en pa dan bon direksyon. Mersi M. Speaker.