IN THE ASSEMBLY THIS WEEK

This week the National Assembly debated on a motion brought by Honourable Nichola Prea which reads as follows:

Sa lasanble I aprouve pou demann gouvernman anba tenm Ansanm Pour Lanmour Sesel pou met a dispozisyon bann fasilite neseser tel ki biro pour tou bann MNA ki’n ganny elekte dan zot distrik respektiv.

Honourable Frank Elizabeth (DP) who intervened on the motion pleaded with the SPPF MNAs to vote in favour of the motion as it was not partisan or political in nature. He said that if the motion is approved and then implemented by government it would benefit the whole country irrespective of political affiliation. His plea unfortunately fell on deaf ears as all opposition MNAs voted in favour and all SPPF MNAs voted against the motion. The motion was accordingly defeated. We publish below the speech of Honourable Elizabeth presented before the National Assembly on the 3rd July 2007.

SA MOSYON POU PERMET NOU MEZIR NOU DEMOKRASI

Mersi M. Speaker. M. Speaker Mon dezapwente avek ton e agresivite bann manm lasanble parti SPPF ler zot adres sa mosyon. Avek sa nouvo lasanble serye e nouvo Prezidan ki fek ganny elekte mon ti kwar travay lasanble pou diferan. I kler pou mwan ki sa pa pou leka. M. Speaker, sa mosyon ki Hon. Prea inn amenn devan lasanble ozordi I vreman enportan. Mon kwar, koriz mwan si mon mal, M. Speaker, I fer dezyenm fwa ki en tel mosyon I ganny anmennen devan lasanble pou deba. Sa mosyon a lafen dizour I pou permet nou mezir kote nou demokrasi inn arrive e dan ki direksyon I pe ale. Apre 15an lekzistans 3enm Repiblik I malere ki enn nou manm lasanble Inn santi li neseser pou anmenn en tel mosyon devan lasanble. Mon tia kwar ki gouvernman ti a var pran li lo limenm pou adres sa size san nesesite en deba lasanble lo si I neseser oubyen I anan en lobligasyon lo gouvernman pou met fasilite dan distrik pou bann MNA kinn ganny elekte dan sa bann distrik respektif.

GOUVERNMAN FODRE KONSTRI BIRO MNA

idealman mon tya swete ki evantyelman gouvernman I avar konstri bann biro ek fasilite neseser dan tou distrik, pou tou MNA, kinn ganny elekte avek en bidze pou pey depans ki lye avek ladministrasyon sa biro. Anou pa obliye ki Prezidan Michel inn toultan dir e repete ki I Prezidan tou Seselwa e ler gouvernman I fer provizyon pou met bann fasilite neseser a dispozisyon tou bann MNA dan distrik, gouvernman I avar pe demontre en lanvi pou anan en demokrasi vivan, dynamik e enn ki satisfer bezwen ek lekspektasyon tou nou pep.

M. Speaker plizyer pei dan lemonn kot I anan en demokrasi matyr, modern e dynamik, gouvernman I met a dispozisyon bann manm parlman kinn ganny elekte pa zis fasilite pou fer zot travay me I osi donn zot en bidze anyel pou pey pou bann servis ki zot bezwen pou fer zot travay o nivo distrik. Legzanmp parey Onorab Prea inn donen se Moris. Anou pa obliye ki dan tou distrik Inn anan dimoun kinn vot pou parti mazoriter osi byen ki parti lopozisyon. Sa bann dimoun I bezwen en pwen kontak kot zot kapab asize e diskit zot problenm dan distrik dan en fason konfidansyel e dan en lanvironnman konfortab. M. Speaker I pa zoli pou vwar manm piblik pe diskit zot problenm avek zot MNA lo grann rout piblik dan lizye tou dimoun.

ANOU PA PINI DISTRIK KINN VOT LOPOZISYON

La I nou sans ankor enn fwa pou nou montre le pep Seselwa ki gouvernman I anvi toultan sa ki bon pou son pep. Ki nou gouvernman I anan sa grander lespri pou li satisfe laspirasyon ek lespektasyon son pep menm si mazorite dimoun dan serten distrik inn vot pou lopozisyon. Annou pa pran latitid kot dimoun dan distrik kinn vot lopozisyon I ganny pini akoz zot inn ekzers zot dwa konstitisyonel e eksprim en preferans pou en kadida lopozisyon. Anou pa obliye ki dan sa bann distrik I osi anan en kantite dimoun kinn vot pou kandida parti mazoriter menm si sa kandida pann raport eleksyon. Lefe I reste alor ki dan tou distrik I anan dimoun ki siport parti mazoriter e osi dimoun ki siport parti lopozisyon. Napa naryen mal avek sa M. Speaker, okontrer I montre ki Sesel nou demokrasi I reel, I vivan e I pe evolye. Parey Prezidan Michel inn dir ki I prezidan tou Seselwa o nivo nasyonal, sa MNA kinn ganny elekte dan distrikI osi I MNA tou dimoun dan sa distrik e non pa MNA zis sa bann kinn vot pou li. Ler sa bann fasilite I a ganny met a dispozisyon bann MNA e bann zabitan bann distrik respektiv, tou dimoun I a kapab ganny akse ek sa bann fasilite, me an menm tan, sa ki pli enportan ankor, se ki zot a ganny akse avek zot MNA dan zot distrik menm.

I NEPLI LETAN POU SAKENN BOS SON KOTE

I anan en largiman kinn ganny avanse ki pe dir ki bann parti politik fodre met zor prop fasilite dan distrik. M. Speaker nou tou nou konen ki larzan ki gouvernman i donn bann parti politik me espesyalman lopozisyon i pa ase pou al konstri biro dan tou distrik. En lot problenm avek sa largiman se ki pou arive avek sa biro si demen sa MNA i perdi eleksyon dan sa distrik ? Mon mon kwar ki gouvernman i sa lorgan pli aproprye pou met sa bann fasilite dan distrik akoz a la fen dizour sa fasilite pou deservi tou dimoun dan distrik irrespektiv zot parti politik.

M. Speaker sa ki sa mosyon pe demande I pa extraordiner oubyen spesyal. An efe tou dimoun dan Sesel e tou MNA pou benefisye si sa mosyon I ganny pase par lasanble e par laswit I ganny enplimante par gouvernman. I pa en mosyon ki pe diskriminen ant MNA SPPF ek MNA SNP oubyen ki pou donn lavantaz enn viz-z-vis lot. Alor mon tya enplor bann MNA dan parti mazoriter pou vot an faver sa mosyon e montre lepep Seselwa ki le de parti dan lasanble I kapab travay ansanm pou byenet nou pep e lentere nasyonal. I nepli letan pou nou sakenn bos son kote e essey ganny en lavantaz politik dan lasanble, me okontrer anou koste zepol ansanm pou byenet nou pep, nou nasyon ek nou pei. M. Speaker, latolerans I reste touzour enn nou bann pli gran defi politik. E etan ki nou en pti pei avek enn pti popilasyon nou bann problenm ti a kapab ganny rezourd vitman e dan en fason efektif si nou ti met lentere partisan e lentere parti politik dekote e fer keksoz ki pou benefisye tou nou dimoun.

TRAVAY, TRAVAY FOR E TRAVAY PLI FOR ANKOR

M. Speaker eleksyon inn fini, e la I absoliman neseser pou nou travay, travay for e travay pli for ankor pou tou nou pep. I osi devwar gouvernman pou met bann fasilite dan tou distrik pou permet tou nou bann MNA fer zot travay pou tou nou pep. Mon pou alor siport sa mosyon M. Speaker e mon pou osi vot an faver sa ki sa mosyon pe demande. Mersi M. Speaker.