Ki rezon James Michel in taye pou fer eleksyon?
SPPF ti deza annan en mazorite 23 manm dan Lasanble, akoz ki Jj i bezwen en pli gran mazorite?
Diskour lo leta lanasyon ti sipoze fer an Fevriye. Me Mr. Michel ti deside anvoy sa pou Mars. Le 20 Mars 2007, i ti dizourd Lasanble. Sa ti ganny fer malgre ki Mr. Gappy ti’n fini dir ki eleksyon ti pou fer an Oktob. Mr. Michel ti osi deside pou pa donn sans lopozisyon pou reponn son diskour. Akoz ki tou pe ganny fer an-tayan? Sa kestyon I tre enportan pour lepep Seselwa reflesir lo la. I pou ed nou konpran vre danze ki devan nou, e osi ed nou konpran akoz ki dan sa eleksyon le 12 Me, i enportan pou ou vot pour kandida lopozisyon dan ou distrik.
Servi pouvwar prezidan
Pou ede reflesir lo sa size, nou pe osi met sa pwen swivan devan zot. Mr. Michel ti bezwen atann zis 7 mwan pour eleskyon. Me in deside servi son pouvwar koman prezidan pour li dizourd sa Lasanble. E pourtan sa pouvwar i kapab servi zis 2 fwa dan son manda. Premye fwa i fer li san konsekans lo li konman prezidan, me si i bezwen servi li ankor, i pou bezwen demisyonnen konman prezidan e la pei pou annan eleksyon Lasanble ek Prezidansyel ankor. Eski zot konmans konpran akoz ki nou pe dir ki sa risk ki i pe pran i montre ki i annan keksoz ki pe vreman mars mal dan nou pei e ki i annan lezot danze?
Mazorite 23 SPPF
Annou fer en lot refleksyon. SPPF ti deza annan en mazorite 23 manm dan Lasanble. Avek sa i ti kapab pas nenport lalwa ki i ti anvi, aprouv bidze, e ekzekit tou progranm ki gouvernman ti annan. Sel pouvwar ki i ti napa sete lotorite pou li sanz Konstitisyon, akoz pour fer sa I ti bezwen en mazorite 2 tyer dan Lasanble. Alor akfer ki Mr. Michel pe dir ki i anvi en pli gran mazorite dan sa eleksyon? Eski pa i kler ki sa boug i anvi zwe avek Konstitisyon e fer sa ki i anvi avek nou pei?
Jj pankor donn rezon
En keksoz ki Seselwa I bezwen osi reflesir lo la se lefe ki ziska prezan Mr. Michel pankor donn nou okenn rezon akoz ki in dizourd Lasanble e ki son plan pour nou pei. I pankor dir nanryen lo akoz I bezwen en pli gran mazorite, e ki nouvo progranm ki Sesel I kapab ekspekte gannyen si I ganny sa mazorite ki I pe rode. Sanmenm sa ki ou apel kabri dan sak.
Ouver nou lizye gran
Nou anvi dir zot pou ouver zot lizye byen gran. Atansyon zis fer konfyans en parti politik ki pa pe dir nou nanryen lo nou lavenir. Seselwa, sa eleksyon ki devan nou I tre serye. Le 12 Me, ou pe desid ou lavenir. Annou pa zanmen donn okenn parti politik pouvwar pou sanz Konstitisyon . Reflesi byen.